Gjykata Themelore në Prishtinë ka caktuar datën 24 dhjetor si ditën e fillimit të gjykimit ndaj vëllezërve Dragisha dhe Jovan Viqentijeviq, si dhe ndaj Igor Dimoviq, të akuzuar për sulmin në kanalin e Ibër-Lepencit në fshatin Varagë të Zubin-Potokut.

Lajmin e ka konfirmuar për Arbresh.info, zëdhënësja e Gjykatës, Mirlinda Gashi.

Prokuroria Speciale e Republikës së Kosovës (PSRK) më 9 dhjetor 2024 ka ngritur aktakuzë ndaj të tre të pandehurve, të cilët ngarkohen për sulmin e ndodhur më 29 nëntor 2024 në kanalin e Ibër-Lepencit, një infrastrukturë publike me rëndësi të madhe për furnizimin me ujë të pijshëm dhe për nevojat e prodhimit të energjisë elektrike nga Korporata Energjetike e Kosovës (KEK).

Sipas aktakuzës së siguruar nga “Betimi për Drejtësi”, vëllezërit Dragisha dhe Jovan Viqentijeviq dyshohet se më 29 nëntor 2024, rreth orës 18:50, kanë vendosur eksploziv në një pjesë të kanalit të Ibër-Lepencit në Varagë, Komuna e Zubin-Potokut, duke rrezikuar infrastrukturën kritike dhe sigurinë publike./Arbresh.info